რუსთავი 2-ის ადვოკატი, თამთა დემურაშვილი „ნიუპოსტთან“ საუბრისას აცხადებს, რომ მათ მოსამართლეთა კოლეგიის ხელმძღვანელის, ნათია გუჯაბიძის აცილება რამდენიმე მიზეზის გამო დააყენეს. მისი თქმით, არსებობს დასაბუთებული ეჭვი, რომ მოსამართლე ნათია გუჯაბიძე არ არის მიუკერძოებელი და დამოუკიდებელი:

„ქალბატონ გუჯაბიძეს არ უარყვია, რომ მას სასამართლო სისტემის გარეთ აქვს მჭიდრო კოლეგიალური ურთიერთობა მოსამართლე ურთმელიძესთან მინიმუმ სამი წლის განმავლობაში. მას შემდეგ რაც, მათ დააფუძნეს ორგანიზაცია „მოსამართლეთა ერთობა“, სწორედ ეს ორგანიზაცია იყო ერთადერთი, რომელმაც მხარდამჭერი განცხადება გააკეთა მოსამართლე ურთმელიძის მიმართ, ასევე მათ პირადი შეფასებები გააკეთეს ნიკა გვარამიას პერსონაზე. ასევე ხაზი გაუსვეს იმას, რომ შეზღუდულ იქნას სიტყვის თავისუფლება, ყოველივე ეს განცხადებები იძლევა იმის ვარაუდის საშუალებას, რომ მოსამართლე იქნება მიკერძოებული“, - განუცხადა „ნიუპოსტს“ თამთა დემურაშვილმა.