"რუსთავი 2"-ის საქმე - ადვოკატები მოსამართლე ნათია გუჯაბიძის აცილებას ითხოვენ

სამართალი - 11:51, 27 Apr, 2016

1915

სააპელაციო სასამართლოში რუსთავი 2-ის სასამართლო პროცესი მიმდინარეობს. პროცესს „რუსთავი2“-ის გენერალური დირექტორი ნიკა გვარამია და ყარამანიშვილების ოფიციალური წარმომადგენელიც ესწრება.

პროცესის დაწყებამდე ადვოკატებმა უკვე დააყენეს ერთ-ერთი მოსამართლის, ნათია გუჯაბიძის აცილების შუამდგომლობას. ამის საფუძველს, რუსთავი 2-ის ინტერესების დამცველების თქმით, არის ის, რომ გუჯაბიძე არის იმ ერთ-ერთი არასამთავრობო ორგანიზაციის დამფუძნებელი, რომელიც იცავდა თამაზ ურთმელიძის უფლებებს მაშინ, როდესაც მასთან დაკავშირებით არაერთი კითხვა არსებობდა რუსთავის 2-ის პროცესების თაობაზე. თუმცა ქიბარ ხალვაშის მხარე ამ შუამდგომლობას არ დაეთანხმება.

მოსამართლეთა კოლეგია მხარეების საჩივრებს ისმენს. სამაუწყებლო კომპანია აპროტესტებს თბილისის საქალაქო სასმართლოს მოსამართლის თამაზ ურთმელიძის გადაწყვეტილებას, რომლითაც მან რუსთავი 2-ის წილის 100% ქიბარ ხალვაშს მიაკუთვნა. ტელეკომპანიის ადვოკატები ასევე ასაჩივრებენ ურთმელიძის რამდენიმე განჩინებასაც. საკუთარი საჩივარი აქვს მეორე მხარესაც - ხალვაშის ადვოკატი, პაატა სალია ასევე გააპროტესტებს ურთმელიძის რამდენიმე გადაწყვეტილებას.

დღევანდელ არსებით განხილვაზე სამი მოსამართლისგან შემდგარი კოლეგია ორივე მხარის შუამდგომლობებს მოისმენს.

„რუსთავი2“-ის საქმის განხილვა ერთი კვირის წინ დაიწყო. ეს პროცესის მეორე სხდომაა.პირველ სხდომას ვერ ესწრებოდა რუსთავი 2-ის გენერალური დირექტორი ნიკა გვარამია, ადვოკატების შუამდგომლობის მიუხედავად, მოსამართლეებმა არ გადადეს პროცესი და შემდეგი სხდომა სამი სამუშაო დღის შემდეგ ანუ დღეს დანიშნეს. სწორედ ამ მიზეზით გაჩნდა მოსაზრება, რომ ხელისუფლება ცდილობს ფორსირებულ რეჟიმში ჩაატაროს სასამართლო.