თბილისის სააპელაცო სასამართლოში რუსთავი 2-ის პროცესი დაიწყო. სასამართლოში უკვე მივიდნენ რუსთავი 2-ისა და ქიბარ ხალვაშის ადვოკატები. სხდომის დაწყებამდე ჟურნალისტებთან კომენტარი ტელეკომპანიის ადვოკატმა, ზაზა ბიბილაშვილმა გააკეთა.

„რაც შეეხება პროცესის წარმოების ვადებს, მოსამართლეებმა საკუთარი პირობა გადათქვეს. მათ განაცხადეს, რომ პირველ რიგში განიხილავდნენ უზრუნველყოფის საკითხს, რომელიც ეხებოდა TV საქართველოს დაყადაღებას. მაგრამ შემდეგ სხდომაზე ყოველგვარი მოტივაციის გარეშე, განაცხადეს, რომ ეს პოზიცია შეიცვლებოდა და ისინი უზრუნველყოფის საკითხს გაურკვეველი ვადით გადადებდნენ. ბუნებრივია, ეს პროცესი აჩენს კითხვებს და იძლევა ჩვენი მხრიდან შეშფოთების საფუძველს. იმ ფონზე, როდესაც ჩვენ ვხედავდით, როგორ ვითარდებოდა პროცესები პირველი ინსტანციის სასამართლოზე“, - განაცხადა ზაზა ბიბილაშვილმა.

სასამართლო პროცესს ესწრება საქართველოს იუსტიციის მინისტრის ყოფილი მოადგილე დავით ჯანდიერიც. მისი თქმით, იგი პროცესზე რუსთავი 2-ის მხარდასაჭერად მივიდა:

„აქ მოვედით იმისათვის, რომ სოლიდარობა გამოვუცხადოთ რუსთავი 2-ს. მიგვაჩნია, რომ პროცესი, რომელიც მიმდინარეობს სააპელაციო სასამართლოში, უნდა იყოს გამჭვირვალე და არ დატოვოს არავითარი კითხვის ნიშნები, თუმცა, დაჩქარებული ტემპი, რომელსაც ჩვენ ვაკვირდებით, იძლევა საკმაოდ ცუდი პროგნოზების გაკეთების საშუალებას. არ უნდა დავუშვათ სასამართლოს დამოუკიდებლობის ხელყოფა“, - განაცხადა დავით ჯანდიერმა.