დედა-შვილის მკვლელობაზე დაკავებული ზურაბ ესიაშვილი გირაოს სანაცვლოდ გაათავისუფლეს

სამართალი - 13:58, 22 Apr, 2016

3218

ნატო და გურამ კვეზერელების მკვლელობის საქმესთან დაკავშირებით, დანაშაულის შეუტყობინებლობის გამო დაკავებული პირი სასამართლომ გირაოს სანაცვლოდ გაათავისუფლა.

ზურაბ ესიაშვილს 3000 ლარიანი გირაოს გადახდა დაეკისრა. ესიაშვილი სასამართლო პროცესზე ბადრაგის გარეშე მოვიდა. მისი განმარტებით პატიმრობიდან ის პროკურატურამ გაათავისუფლა.

ცნობისთვის, მკვლელობის საქმეზე დაკავებული კიდევ ერთი პირი ირაკლი კაკაურიძე გუშინ დაკითხვის შემდეგ გაათავისუფლეს.

ადვოკატის განმარტებით, მისი დაცვის ქვეშ მყოფი დანაშაულის დაფარვის ბრალდებით დააკავეს, თუმცა საბოლოოდ მისთვის ბრალი არ წარუდგენიათ.

შსს-მ დედა-შვილის, ნატო და გურამ კვეზერელების მკვლელობის საქმე გახსნილად 20 აპრილს გამოაცხადა.
დანაშაულში ბრალდებულ პირებს ბრალი წაეყენათ სისხლის სამართლის 109-ე მუხლით. ერთ-ერთი პირი დაკავებულია, მეორე პირის ადგილსამყოფელი ცნობილია.

შეგახსენებთ, რომ 27 წლის გურამ კვეზერელის ცხედარი სამართალდამცავებმა ორწლიანი ძებნის შემდეგ კოჯორში მეტალის კასრში ჩამარხული იპოვეს.

გამოძიების ინფორმაციით, ბრალდებულებმა გურამ კვეზერელის მკვლელობის შემდგ, იმავე დღეს ახალგაზრდა მამაკაცის დედა მოკლეს. 2014 წელს ნატო კვეზერელი ორდღიანი ძებნის შემდეგ გარდაცვლილი მეზობლებმა საკუთარი ბინის აბაზანაში იპოვეს. სახლიდან კი 12 ათასი დოლარი და სხვა ნივთები იყო წაღებული.