მებაჟეებმა ნარკოტიკული ნივთიერებების შემცველი მედიკამენტების შემოტანის ფაქტი გამოავლინეს

სამართალი - 18:00, 11 Apr, 2016

1878

ნარკოტიკული ნივთიერებების შემცველი მედიკამენტების უკანონო შემოტანის რამდენიმე მცდელობა გამოვლინდა ბოლო დღეებში საქართველოს საბაჟო გამშვებ პუნქტებზე. მათ შორის, ასეთი ფაქტი გამოავლინეს მებაჟე ოფიცრებმა 6 და 9 აპრილს საბაჟო გამშვებ პუნქტზე „სარფი“. თურქეთის რესპუბლიკისა და აზერბაიჯანის მოქალაქეებს 20-20 აბი ნარკოტიკული ნივთიერების შემცველი მედიკამენტი APRANAX PLUS აღმოაჩნდათ. ეს ორი საქმე რეაგირების მიზნით გადაეცა საქართველოს შსს აჭარის ავტონომიური რესპუბლიკის პოლიციის დეპარტამენტის ხელვაჩაურის რაიონული სამმართველოს მახინჯაურისა ახალშენის პოლიციის განყოფილებებს.

8 აპრილს ანალოგიური ფაქტი მოხდა საბაჟო გამშვებ პუნქტზე „ვალე“. ავტომობილში, რომელსაც ირანის მოქალაქე ა.მ. მართავდა, მებაჟე ოფიცრებმა 10 აბი ნარკოტიკული ნივთიერების შემცველი მედიკამენტი ACETAMINOPHEN CODEIN აღმოაჩინეს. 10 აპრილს კი საბაჟო გამშვებ პუნქტზე „ლაგოდეხი“ აზერბაიჯანის მხრიდან შემოვიდა გერმანიის მოქალაქე ვ.მ., რომელსაც ეჭვის საფუძველზე კუთვნილი ბარგის დათვალიერების შედეგად აღმოაჩნდა 19 აბი ნარკოტიკული ნივთიერების შემცველი მედიკამენტი TRAMADOL.

ეს ორი საქმე შემდგომი რეაგირების მიზნით გადაეცა შსს ადიგენისა და ლაგოდეხის რაიონულ სამმართველოებს.