ელისო კილაძემ ვაჟა ლილუაშვილთან დაკავშირებით პროკურატურას ინფორმაცია მიაწოდა

სამართალი - 14:19, 09 Apr, 2016

4044

„ქრონიკა+“-ის რედაქტორი პროკურატურაში ფარული ჩანაწერების საქმეზე ჩვენების მისაცემად იმყოფებოდა, ელისო კილაძის თქმით მას აქვს ვიდეოჩანაწერი, რომელიც კუდ-ის ყოფილ მაღალჩინოსანს ვაჟა ლილუაშვილს ეხება, როგორც ჟურნალისტი აცხადებს აღნიშნული ვიდეოფირიდან ირკვევა, რომ ლილუაშვილი გარკვეული თანხის მიღების მიზნით ზეწოლას ახორციელებდა ერთ-ერთ ბიზნესმენზე. ვიდეოჩანაწერი ჟურნალისტმა საგამოძიებო უწყებას გადასცა.

“ჩვენს არქივში ინახება ერთი ძალიან საინტერესო ვიდეოფირი. გაგიკვირდებათ და ეს ვიდეო გადაღებულია ვაჟა ლილუაშვილთან სახლში. ფირის არსებობა თავისთავად უკვე ნიშნავს დანაშაულს იმიტომ, რომ ის უკანონოდ იწერდა პირს, რომელსაც ესაუბრება. მე არ ვიცი, ვინ არის ის ბიზნესმენი და, ალბათ, პროკურატურა ამას დაადგენს. საუბარია წილების გაფორმებაზე, 150 ათას დოლარზე და რაღაც ქონების დათმობაზე და დაბრუნებაზე. რაც შეეხება ფარულ ჩანაწერებს, ერთადერთი ინფორმაცია, რაც მაქვს, გახლავთ ის, რომ ვაჟა ლილუაშვილი გამუდმებით თან დაატარებდა ლეპტოპს, რომელშიც ჰქონდა ეს არქივი,“ - განაცხადა ელისო კილაძემ.

ელისო კილაძე საჭიროების შემთხვევაში მზადაა პროკურატურასთან თანამშრომლობა გააგრძელოს.