ძლიერმა ქარმა გორის მუნიციპალიტეტის სოფელ მერეთში მცხოვრებ მახარაშვილების 7-სულიანი ოჯახის საცხოვრებელ სახლს დღეს, გამთენიისას სახურავი ახადა. შემთხვევის დროს ოჯახის ყველა წევრი სახლში იმყოფებოდა, თუმცა არავინ დაზარალებულა. როგორც ისინი ამბობენ, მათ სახლი რამდენიმე კვირის წინ ერთ-ერთი საკრედიტო ორგანიზაციისგან აღებული სესხის საშუალებით გადახურეს, თუმცა სტიქიის შედეგად, ის სრულად დაზიანდა.

ადგილზე მივიდა და არსებულ ვითარებას პირადად გაეცნო გორის მუნიციპალიტეტის გამგებელი, დავით ონიაშვილი. ადგილობრივი აღმასრულებელი ხელისუფლების პირველმა პირმა დაზარალებულებს დროებითი გადასახური მასალა მიუტანა, რაც მახარაშვილებს საშუალებას მისცემს, ამინდის გაუარესების შემთხვევაში, არსებული ავეჯი და სხვა ინვენტარი დაიცვან.

ხვალიდან კი გორის მუნიციპალიტეტის გამგეობის შესაბამისი სამსახურები დაზიანებული შენობის კაპიტალური გადახურვისთვის საჭირო სამუშაოებს დაიწყებენ. დავით ონიაშვილის განცხადებით, მახარაშვილების საცხოვრებელ სახლს რეაბილიტაცია უმოკლეს დროში ჩაუტარდება.

გიორგი ახალკაცი
"ნიუპოსტი" გორი