ესპანეთში მომხდარ ავტოკატასტროფის შედეგად დაშავებულთა შორის ქართველი სტუდენტები არ არიან

შემთხვევა - 18:27, 20 Mar, 2016

2451

ესპანეთში მომხდარი ავტოკატასტროფის შედეგად დაშავებულთა შორის საქართველოს მოქალაქეები არ არიან - ინფომრაცია ამის შესახებ საქართველოს საკონსულომ კატალონიის პოლიციის დეპარტამენტიდან მიიღო. საქართველოს გენერალური კონსული კატალონიაში ბექა ზარანდია აცხადებს, რომ ქართული მხარე დაუკავშირდა კატალონიის პოლიციის დეპარტამენტს და მათი ინფორმაციით, დაშავებულთა სიაში საქართველოს მოქალაქეები არ არიან.

,,ესპანეთში ერასმუსის სტუდენტური გაცვლითი პროგრამით წასული საქართველოს მოქალაქეებიდან ბევრმა მათგანმა უკვე დაგვიდასტურა, რომ არ ყოფილან იმ ავტობუსში, დანარჩნებს ვეხმიანებით და იმედი გვაქვს, რომ ყველა დამიდასტურებს უახლესი ერთი საათის განმავლობაში. სულ ამ წუთას ევროპაში აღნიშნული პროგრამის ფარგლებში 35 სტუდენტი გვყავს გაგზავნილი, ხოლო ესპანეთში ვინც გვყავს გაგზავნილი, ისინი ყველა ჯანმრთელია და თავის სახლში იმყოფებიან“ - აცხადებს საგარეო ურთიერთობათა დეპარტამენტის უფროსი თეა გერგედავა.

4 ადამიანი დაიღუპა და 43 დაშავდა ავტოკატასტროფის შედეგად, რომელიც ესპანეთში ფლეჯინალსის მუნიციპალიტეტში მოხდა. ავტოსტრადა ბარსელონადან 150 კილომეტრის მოშორებითაა და ის კატალონიის დედაქალაქს ვალენსიასთან აკავშირებს.

ავტობუსში 57 მგზავრი იმყოფებოდა. 43 დაშავებულიდან 30 სააავადმყოფოშია გადაყვანილი, დანარჩენებს ჰოსპიტალიზაცია არ დასჭირდათ.

ავტობუსის მძღოლი გადარჩა და ის პოლიციის განყოფილებაშია გადაყვანილი.

ავტობუსში იმყოფებოდნენ სტუდენტები, რომლებიც ვალენსიის ფოერვერკების ფესტივალიდან ბრუნდებოდნენ.

ავტოკატასტროფა დილის 6 საათზე მოხდა. ავტობუსი ბორდიურს გამოედო, რის შედეგადაც მოტრიალდა და მოძრაობის საპირისპირო ზოლზე გადავიდა, სადაც შემხვედრ ავტომობილს შეეჯახა.

ოფოციალური ხელისუფლების განცხადებით, ავტობუსში იმყოფებოდნენ სტუდენტები, რომლებიც ევროპის ქვეყნების უნივერსიტეტებიდან გაცვლითი პროგრამებით იყვნენ ჩასული. ჯერ-ჯერობით უცნობია, რომელი ქვეყნის სტუდენტები არიან.