შსს "ნიუპოსტის" მთავარი რედაქტორის სახლის ჩხრეკაზე განცხადებას ავრცელებს

სამართალი - 18:20, 18 Mar, 2016

2476

შს სამინისტრომ ,,ნიუპოსტის“ რედაქტორის სახლის ჩხრეკასთან დაკავშირებით საგანგებო განცხადება გაავრცელა. განცხადებაში ნათქვამია, რომ ოპერატიული ღონისძიება ჩხრეკის სახით, რომელიც ჩატარდა ეკატერინე შინდაგორიძის სახლში, ,,ნიუპოსტის“ საქმიანობას არ უკავშირდებოდა. თუმცა ჩხრეკის შედეგად სახლებში კანონსაწინააღმდეგო არფერი აღმოჩენილა.

ხოლო, რაც შეეხება ეკატერინე შინდაგორიძის ვაჟს დავით ჯ.-ს, შსს-ს ინფორმაციით, ის იქნა გამოკითხული მხოლოდ მოწმის სახით და დაკავებული არ ყოფილა.

"მაღალი საზოგადოებრივი ინტერესიდან გამომდინარე, გაცნობებთ, რომ შსს-ს ცენტრალური კრიმინალური პოლიციის დეპარტამენტის თანამშრომლებმა მიღებული ინფორმაციის საფუძველზე დაიწყეს გამოძიება ცეცხლსასროლი იარაღის უკანონო შეძენა-შენახვა-ტარების ფაქტზე, საქართველოს სსკ-ის 236-ე მუხლის მე-2 და მე-3 ნაწილებით.

გამოძიების ფარგლებში, გადაუდებელი აუცილებლობით, გაიჩხრიკა 1989 წ. დაბადებული დავით ჯ.-ს საცხოვრებელი სახლი.

გამოძიების ამ ეტაპზე დაკავებული არავინაა. დავით ჯ. მოწმის სტატუსით გამოიკითხა.

აქვე ხაზგასმით აღვნიშნავთ, რომ მოცემული საგამოძიებო-ოპერატიული ღონისძიება კავშირში არ არის რომელიმე მედიასაშუალებასთან. ოპერატიული ინფორმაცია შეეხებოდა კონკრეტულ შესაძლო დანაშაულს მედიასაშუალების წარმომადგენლის ოჯახის წევრთან დაკავშირებით.

შსს-ს მტკიცე პოზიციაა, რომ ნებისმიერი ადამიანი თანასწორია კანონის წინაშე და უწყების რეაგირება მხოლოდ კანონის ჩარჩოებში ხორციელდება."- აღნიშნულია უწყების განცხადებაში.

სამართალდამცავებმა „ნიუპოსტის“ მთავარი რედაქტორის საცხოვრებელი სახლები გუშინ გაჩხრიკეს. თუმცა, ჩხრეკის შედეგად ადგილზე კანონსაწინააღმდეგო არაფერი აღმოუჩენიათ.

შედგა შესაბამისი ოქმი, თუმცა, ბოლო წუთს სამართალდამცავებმა ეკატერინე შინდაგორიძის ვაჟი, დავით ჯ. შინაგან საქმეთა სამინისტროში დაკითხვაზე გადაიყვანეს. ნახევარსაათიანი დაკითხვის შემდეგ კი ახალგაზრდა ყოველგვარი ახსნა-განმარტების გარეშე გაათავისუფლეს.

აღანიშნავია, რომ ეკატერინე შინდაგორიძემ მომხდარი ფაქტის გამო ოფიციალური განცხადებით მიმართა აშშ-ს საელჩოს და საქართველოში აკრედიტირებულ დიპლომატიურ კორპუსს.