მთავარი პროკურატურისათვის დღეს აუდიო ჩანაწერების გადაცემას აპირებს ჟურნალისტი გიორგი ფარესიშვილი.

იგი მთავარ პროკურატურაში გუშინ 5 საათის განმავლობაში იკითხებოდა. ჟურნალისტის მტკიცებით, მისი პირადი ცხოვრების ამსახველი კადრების გავრცელებით გიორგი მამაცაშვილი, გელა ხვედელიძე და ნუგზარ ფოფხაძე იყვნენ დაინტერესებულნი.

იგი არ გამორიცხავს, რომ მათ პირადი ცხოვრების ამსახველი სხვა ვიდეო ჩანაწერებიც ჰქონდეთ. მისივე განცხადებით, ამის დადასტურებას აუდიო ჩანაწერების მეშვეობით შეძლებს.

„ერთ-ერთი ადამიანი არის შევარდნაძის დროინდელი ყოფილი რუხი კარდინალი, ნუგზარ ფოფხაძე, რა თქმა უნდა გელა ხვედელიძე და ეგრეთ წოდებული ჟურნალისტი, გიორგი მამაცაშვილი. ნუგზარ ფოფხაძისა და გელა ხვედელიძის დავალებით მოხდა ამ კადრების გავრცელება. საუბარია იმ აუდიო ჩანაწერზე, სადაც ნუგზარ ფოფხაძე ამბობს „ეს ფირი გვაქვს ჩვენ“. არ გამოვრიცხავ, რომ ამ ადამიანებს დღემდე ჰქონდეთ წვდომა და ჰქონდეთ გარკვეული ბაზა სხვადასხვა ასობით მსგავსი ჩანაწერისა“, - განაცხადა ფარესიშვილმა.