რამდენიმე წუთის წინ დაასრულეს სამართალდამცავებმა „ნიუპოსტის“ მთავარი რედაქტორის, ეკატერინე შინდაგორიძის კუთვნილი სახლების ჩხრეკა. შინაგან საქმეთა სამინისტროს წარმომადგენლებმა გაჩხრიკეს შინდაგორიძის კუთვნილი ორი საცხოვრებელი, თუმცა, ჩხრეკის შედეგად ადგილზე კანონსაწინააღმდეგო არაფერი აღმოუჩენიათ.

შედგა შესაბამისი ოქმი, თუმცა, ბოლო წუთს სამართალდამცავებმა ეკატერინე შინდაგორიძის ვაჟი, დავით ჯვარშეიშვილი შინაგან საქმეთა სამინისტროში დაკითხვაზე გადაიყვანეს.

როგორც სამართალდამცავებმა ახლობლებს უთხრეს, ფორმალური პროცედურაა და ახალგაზრდას მალე გამოუშვებენ.

რაც შეეხება შინაგან საქმეთა სამინისტროს ოფიციალურ კომენტარს, მას ამ დრომდე ველოდებით. ადგილზე იმყოფება „ნიუპოსტის“ კორესპონდენტი და ტელეკომპანია „რუსთავი 2“-ის გადამღები ჯგუფი. ეკატერინე შინდაგორიძე აღნიშნულ საკითხზე კომენტარს მოგვიანებით გააკეთებს.