ორი პირის დაკავება ინტერნეტ სივრცეში კადრების ატვირთვის გამო არ მომხდარა- პროკურატურა

სამართალი - 12:40, 15 Mar, 2016

4084

საქართველოს მთავარი პროკურატურა 157-ე მუხლით ორი პირის დაკავების შესახებ განცხადებას ავრცელებს, როგორც უწყება აზუსტებს მათი დაკავება პირადი ცხოვრების ამსახველი უკანონო კადრების შენახვა-გავრცელების ფაქტზე მოხდა და არა ინტერნეტ სივრცეში ატვირთვის გამო.
"საზოგადოებას ვაცნობებთ, რომ ზურაბ ჯამალაშვილი და ადვოკატი ირაკლი ფხალაძე დაკავებულები არიან ბრალდებულის სახით, პირადი ცხოვრების ამსახველი უკანონო კადრების შენახვა-გავრცელების ფაქტზე და არა მათი ინტერნეტ სივრცეში ატვირთვის ფაქტზე, როგორც ეს მედიასაშუალებებმა გააშუქეს. მათი დაკავებისა და საქმის გარემოებებთან დაკავშირებით საქართველოს პროკურატურა უახლოეს ხანში დეტალურ ინფორმაციას მიაწვდის საზოგადოებას. ამ ეტაპზე მიმდინარეობს საგამოძიებო და საპროცესო მოქმედებები", - ნათქვამია პროკურატურის განცხადებაში.
მთავარი პროკურატურის საზოგადოებასთან და მასმედიასთან ურთიერთობის დეპარტამენტის უფროსი ნათია სუხიაშვილის თქმით არ არის გამორიცხული რომ კიდევ რამდენიმე ადამიანის დაკავება მოხდეს:

„ამ ეტაპზე შემიძლია დაგიდასტუროთ, რომ დაკავებულია ზურაბ ჯამალაშვილი, შესაძლებელია დაკავებული იქნას სხვა პირებიც, სხვა დეტალებს პროკურატურა მოგვიანებით გაავრცელებს.“