დაპირისპირება რელიგიურ ნიადაგზე - შსს-მ გამოძიება დაიწყო

სამართალი - 14:34, 01 Mar, 2016

2275

ადამიანის დევნას სიტყვის, აზრის, სინდისის, აღმსარებლობის, რწმენის, ან მრწამსის გამო, ანდა მის პოლიტიკურ, საზოგადოებრივ, პროფესიულ, რელიგიურ ან მეცნიერულ მოღვაწეობისთვის - ადიგენში მომხდარი რელიგიური დაპირისპირების საქმეზე გამოძიება სისხლის სამართლის კოდექსის 156-ე დევნის მუხლის 1-ლი ნაწილით მიმდინარეობს.

აღნიშნული დანაშაული ჯარიმას ან 2 წლამდე პატიმრობას ითვალისწინებს.

ცნობილია, რომ სოფელ ადიგენში მომხდარზე ერთერთი დაზრალებული ავთანდილ იაკობიძე პოლიციელებმა უკვე დაკითხეს.

სოფელ ადიგენში ადგილობრივი მუსლიმი და ქრისტიანი თემი ფიზიკურად დაუპირსიპირდა რა დროსაც სამი ადამიანი დაშავდა. დაპირისპირების მიზეზი მუსლიმი თემის მიერ სასაფლაოს ადგილის მოთხოვნა გახდა.

ვითარების ესკალაცია რელიგიის სააგენტოს 25 თებერვლის რეკომენდაციამ გამოიწვია, რომლის მიხედვითაც ადიგენის ადგილობრივმა თვითმმართველობამ მუსლიმთა სასაფლაოსთვის ადგილი უნდა გამოყოს.

ადიგენში მომხდარ დაპირისპირებას სრულიად საქართველოს მუსლიმთა სამმართველო ეხმაურება.

"სამწუხაროდ ბოლო წლებში ხელოვნურად ხდება მუსლიმებსა და ქრისტიანებს შორის დაპირისპირების ინსპირირება. ვფიქრობთ, რომ ადიგენში მომხდარი ფაქტიც არის ხელოვნურად ინსპირირებული"- წერია განცხადებაში.

ბოლო ინფორმაციით, ამ დროსთვის სოფელში სიმშვიდეა, თუმცა ადგილზე სამართლადამცავები რჩებიან.