ლანჩხუთში მომხდარ უბედურ შემთხვევაში, უშიშროების მაღალჩინოსანი ფიგურირებს

სამართალი - 14:00, 25 Feb, 2016

14564

გუშინ ღამით ლანჩხუთის მუნიციპალიტეტის სოფელ სუფსაში მომხდარი ავტოსაგზაო შემთხვევის შედეგად ახალგაზრდა ბიჭი დაიღუპა.

ფეხით მოსიარულე 17 წლის გ. გუმბარიძეს მსუბუქმა ავტომანქანამ დაარტყა და ის ადგილზევე გარდაიცვალა. ადგილობრივების თქმით, შემთხვევა სუფსის პოლიციის განყოფილებიდან დაახლოებით 300-400 მეტრში მოხდა. თვითმხილველები ამტკიცებენ, რომ მანქანაში, რომელიც ახალგაზრდას დაეჯახა, უშიშროების მაღალჩინოსნები იყვნენ. ოჯახის ახლობლები ეჭვობენ, რომ გამოძიება კვალის დაფარვას შეეცდება. თვითმხილველები გვეუბნებიან იმასაც, რომ სასწრაფო დახმარების ბრიგადამ 25 წუთი დააგვიანა, რაც მათ ოპერატულად მუშაობის შემთხვევაში, ადგილზე მისვლამდე არ უნდა დასჭირვებოდათ: "ბავშვი ჯერ კიდევ ცოცხალი იყო, სასწრაფოს დააგვიადა მოსვლა, დროულად რომ მოსულიყვნენ, იქნებ გადარჩენილიყო. გზის ამ მონაკვეთზე საშინელი სიტუაციაა, არც გარე განათებაა და გზას გამოსულია მწყობრიდან. დახმარებას ვითხოვთ. უყურადღებობის გამო, ხომ არ შეიძლება ადამიანი იღუპებოდეს"- გვითხრეს სოფელში.
"გურიის მოამბესთან" სუფსის მაჟორიტარი დეპუტატი, ჯუმბერ ბლაგიძე ამბობს, რომ ინფრასტრუქტურის სამსახურმა აღნიშნულ მონაკვეთზე გზის და გარე განათების პრობლემას უნდა მიხედოს:
"მე როგორც დეპუტატს, შეტანილი მაქვს 1000 ხელმოწერა, რომ მოხდეს გარე განათება. რეაგირება უნდა გააკეთოს აიცილებლად ინფრასტრუქტურის სამსახურმა და გზაც შესაკეთებელია"-გვითხრა ბლაგიძემ

რაც შეეხება სასწრაფოს დაგვიანებასთან დაკავშირებით გამოთქმულ პრეტენზიას, ლანჩხუთის სასწრაფო დახმარების ცენტრის ხელმძღვანელის ამირან გოგიტიძის თქმით „სასწრაფოს“ გამოძახება ლანჩხუთის შემთხვევაზე მოხდა 18:14 წუთზე, ბრიგადა დაუყოვნებლივ გავიდა ლანჩხუთიდან 18:16 წუთზე, 18:35 წუთზე იყო შემთხვევის ადგილზე. ეს ის დროა, რაც სჭირდებოდათ გზის იმ მონაკვეთის გასავლელად. სამწუხაროდ, ახალგაზრდა უკვე გარდაცვლილი დახვდათ. "იმ წამებშიც რომ ადგილზე ყოფილიყო სასწრაფო დახმარების ბრიგადა, მისი გადარჩენა ვერ მოხერხდებოდა, მიღებული ტრამვები სიცოცხლესთან აბსოლუტურად შეუსაბამო იყო"- აცხადებს სასწრაფო დახმარების ცენტრის ხელმძღვანელი.