თბილისის საქალაქო სასამართლოს ყოფილი თავმჯდომარე მამუკა ახვლედიანმა არასამთავრობოებთან და მედიასთან შეხვედრა გამართა. ახვლედიანის განცხადებით მისი თანამდებობიდან გადაყენება, სასამართლო სისტემაში არსებულ ხარვეზებთან დაკავშირებით მის მიერ გაკეთებულ განცხადებებს უკავშირდება, ახვლედიანის თქმით მისი გადაწყვეტილებების ანალოგიური გადაწყვეტილებები მიღებული აქვს უზენაეს და სააპელაციო სასამართლოებსაც, თუმცა იუსტიციის საბჭომ დარღვევად მისი გადაწყვეტილება ჩათვალა, ამასთანავე მისი თქმით თანამდებობიდან გადაყენებაც კანონდარღვევით მოხდა, რადგან პოსტი მაშინ დაატოვებინეს როდესაც ის იყო ბიულეტინზე. ახვლედიანი იუსტიციის უმაღლეს საბჭოს წინააღმდეგ სარჩელის შეტანას აპირებს.

„დროთა განმავლობაში ბევრი დაინახავდა იმ სიმართლეს რაც სასამართლო სისტემაში ხდება და ის რისიც ყველაზე მეტად ეშინიათ, შეიძლებოდა ძალიან ბევრი მომხრე ყოფილიყო ამ საკითხებზე. ეს არის ჩემი განცხადებების გამო მომხდარი ფაქტი, ოპტიმიზაციასთან დაკავშირებით მსგავსი ტიპის „დარღვევები“ და გადაწყვეტილებები რაც მე გამოვიტანე მიღებული აქვს უზენაეს სასამართლოსაც და სააპელაციოსაც. კატეგორიები მე არ გამიუქმებია. მასში მყოფ მოსამართლეებს დავავალე განეხილათ სხვა კატეგორიის საქმეებიც“- განაცხადა ახვლედიანმა.

ახვლედიანი ეჭვქვეშ აყენებს მოსამართლეთა საგამოცდო ტესტებთან დაკავშირებით იუსტიციის საბჭოს მიერ ჩატარებულ მოკვლევასაც. თბილისის საქალაქო სასამრთლოს ყოფილი თავმჯდომარის თქმით, შესაძლოა პროკურატურა ამ თემასთან დაკავშირებით უხერხულ სიტუაციაში აღმოჩნდეს და პარლამენტში ამ საკითხზე დროებითი საგამოძიებო კომისიის შექმნასაც არ გამორიცხავს.

„როგორ ჩაატარეს მოკვლევა, რა ფორმებით ჩაატარეს და რა უფლება ქონდათ. ტერმინი - მოკვლევა, მგონი, შევარდნაძის ბოლო წლებშიც აღარ იყო ეს სიტყვა. ჩემთვის გასაკვირია, როდესაც საბჭოს მდივანი, რომელიც არის იმ საგამოცდო კომისიის თავმჯდომარე, თვითონვე ახდენს თავის კომისიაში, კომისიის გარეშე ე.წ. მოკვლევას და შემდგომ კაცმა არ იცის რა მასალები გადააგზავნეს პროკურატურაში, როგორ გამოარკვია ეს საკითხები, როდესაც ამ საკითხში ჩართულია სასამართლო სისტემის ძალიან ბევრი მაღალჩინოსანი. უზენაესი სასამართლოს თავმჯდომარემ გამოკითხა ეს ხალხი, თუ როგორ გაიგო, რომ არავინ არის ჩართული ამ საკითხებში? მე ვერცერთ ადამიანს ხელს ვერ დავადებ მაგრამ შეიძლება ერთი კი არა ბევრი ადამიანი იყოს ამაში ჩართული. მე ძალიან მაინტერესებს რატომ იყო დუმილი ამ საკითხებზე სამი თვის განმავლობაში“ - აღნიშნა მამუკა ახვლედიანმა.

თბილისის საქალაქო სასამართლოს თავმჯდომარეს, მამუკა ახვლედიანს იუსტიციის საბჭომ უფლებამოსილება 22 თებერვალს შეუწყვიტა. მიზეზად დასახელდა ის, რომ მამუკა ახვლედიანმა გადააჭარბა თავის უფლებამოსილებას და სპეციალიზაციებთან დაკავშირებით შეიჭრა იუსტიციის უმაღლესი საბჭოს უფლებამოსილებებში.

ახვლედიანს ასევე შეუწყდა სისხლის სამართლის კოლეგიის თავმჯდომარეობა. მამუკა ახვლედიანის გადაყენებას 12-მა წევრმა დაუჭირა მხარი, ერთი წინააღმდეგი იყო.

თბილისის საქალაქო სასამართლოს თავმჯდომარის მოვალეობებს გიორგი ებანოიძე შეასრულებს. სისხლის სამართლის კოლეგიის თავმჯდომარის მოვალეობებს კი - ეკა არეშიძე.