ექსკლუზივი: ფონიჭალაში მომხდარი საზარელი მკვლელობის დეტალები

ექსკლუზივი: ფონიჭალაში მომხდარი საზარელი მკვლელობის დეტალები - ,,გერს გაუმართლა... სკოლაში იყო"

შემთხვევა - 18:46, 22 Feb, 2016

29827

„ნიუპოსტისთვის“ ზემო ფონიჭალაში ე.წ. არაშენდას მესამე კორპუსში მომხდარი საზარელი მკვლელობის დამატებითი დეტალები გახდა ცნობილი. როგორც "ნიუპოსტს" მოკლული დედა-შვილის მეზობლებმა განუცხადეს, შემთხვევა დღეს დაახლოებით დღის 12:00 საათზე მოხდა. ყელგამოჭრილი ქალის - 35 წლის ნონა რომანაძის ცხედარი საცხოვრებელ ბინაში აღმოაჩინეს, მისი 3 წლის მცირეწლოვანიშვილის ცხედარი კი მთლიანად დამწვარი იყო.

„მეზობლებმა შენიშნეს კვამლი, რომელიც მოკლულების სახლიდან გამოდიოდა. სანამ სასწრაფოსა და სახანძროს გამოიძახებდნენ, მეზობლებმა კარი შეანგრიეს და გარდაცვლილი ქალი აღმოაჩინეს. შიგნით ისეთი დაკვამლიანება იყო, არავის შეუმჩნევია, რომ ქალს ყელი ჰქონდა გამოჭრილი. ყველას ეგონა, რომ ეს უბედური შემთხვევა იყო, თუმცა ნანახმა შოკში ჩაგვაგდო. ქალს ყელი ჰქონდა გამოჭრილი, მის მცირეწლოვან შვილს კი, კვალის დაფარვის მიზნით ბოროტმოქმედებმა ცეცხლი წაუკიდეს“ - ჰყვება მეზობელი.

მისთვის უცნობია, რამდენი ადამიანი დაესხა თავს მამფორიების ოჯახს. მეზობლების თქმით, წაღებულია ფული და ოქრო.

რესპოდენტის მონაყოლიდან ირკვევა, რომ გარდაცვლილი სახლში ქმარ-შვილთან და გერთან ერთად ცხოვრობდა.

„გერს გაუმართლა - ბავშვი სკოლაში იყო. ქმარი სამსახურიდან დაბრუნდა, შეძრულია მომხდარის გამო“ - ამბობს მეზობელი.

მეზობლები ეჭვობენ, რომ შემთხვევა ძარცვას უკავშირდება.

ფონიჭალაში მომხდარი მკვლელობის შესახებ ინფორმაციას ფლობს შინაგან საქმეთა სამინისტრო. ადგილზე ამ დრომდე მუშაობენ ექსპერტ-კრიმინალისტები. ცხედარი ექსპერტიზაზე პროზექტურაშია გადაგზავნილი. როგორც ,,ნიუპოსტს" შსს-ში განუცხადეს, საქმე 109 -ე მუხლით აღიძრა, რაც განზრახ მკვლელობას ითვალისწინებს.

დავით ჯაბაშვილი